Kabhi Gesu Na bigDe Qatil Ke

kabhī gesū na bigḌe qātil ke

nāz-bardār haiñ mire dil ke

mujh ko aġhyār se bhī ulfat hai

ki ye kushte haiñ mere qātil ke

uThe jaate haiñ bazm-e-ālam se

aane vaale tumhārī mahfil ke

un ke dar tak pahuñch ke martā huuñ

Dūbtā huuñ qarīb sāhil ke

dāġh-e-dil ghuT rahe haiñ piirī meñ

bujh rahe haiñ charāġh mahfil ke

hai musāfir-navāz teġh tirī

mujh ko ruḳhsat kiyā gale mil ke

ai ‘rashīd’ ‘uns’ tak the ham shā.ir

ho ga.e ḳhaak hausle dil ke

Leave a Comment