Mohammad Aazam
ga.e hain des ko ham apne chhoḌ kar bhi nahin
muhajrat ke liye shart ab safar bhi nahin
isi jahan men rahte hain ḳhub-ru aise
yaqin mujh ko hua us ko dekh kar bhi nahin
mire vajud men ghul-mil ke kar gaya tanha
vo ek shaḳhs jo aaya kabhi nazar bhi nahin
vo ik kitab ga.i thi dilon se taqon par
ab aisi duur hui hai ki taaq par bhi nahin
gham aur ḳhushi nahin mauquf rone hansne par
aur in havalon se iz.har mo’tabar bhi nahin
Leave a Reply