Osama Khalid
kunDi baja ke is liye bhaga nahin huun main
dikhta nahin kisi ko to socha nahin huun main
pichhle baras ki baat hai kuchh log aa.e the
dastak suni to kamre se chiḳha nahin huun main
jaane main kis ka jism huun aur kis ke paas huun
DhunDa hai ḳhud ko har jagah milta nahin huun main
le jaao mujh ko mujh se magar ek baat hai
lambe safar ke vaste achchha nahin huun main
saaya huun aur din Dhale bujh-vujh gaya huun kya
dekha hai aaj aa.ina dikhta nahin huun main
naḳhun chubho ke bhanp lo mujh men mira vajud
kitna huun apne-ap men kitna nahin huun main
mumkin hai ye malal tumhen bhi fareb de
jaisa mujhe banaya tha vaisa nahin huun main
ik ik dukan se puchha ki main dastiyab huun
inkar sun ke bujh gaya achchha nahin huun main
Leave a Reply