Raunaq-E-Besh-O-Kam Kis Ke Hone Se Hai

Athar Nafees

raunaq-e-besh-o-kam kis ke hone se hai

mausam-e-ḳhushk-o-nam kis ke hone se hai

kis ka chehra banati hain ye sa.aten

vaqt ka zer-o-bam kis ke hone se hai

kaun guzra ki bante ga.e raste

raah ka pech-o-ḳham kis ke hone se hai

kis ki ḳhatir darichon se aa.i hava

ye faza yuun baham kis ke hone se hai

shaḳh-dar-shaḳh patton ki ye zindagi

aaj bhi mohtaram kis ke hone se hai

maut bar-haq hai kis ke na hone se aaj

zindagi dam-ba-dam kis ke hone se hai

kis ki zulfon ka e.ajaz hai bu-e-gul

ye havaon men nam kis ke hone se hai

sub.h-e-shadabi-e-jan ka kyuun hai malal

ishrat-e-sham-e-gham kis ke hone se hai

vahshat-e-dil ko kis ne sambhala diya

ye junun kam se kam kis ke hone se hai

kis se mansub hai har jafa har vafa

ye sitam ye karam kis ke hone se hai