apna ejaaz dikha de saaqi
aag se aag bujha de saaqi
naqsh-e-bedad miTa de saaqi
ham ko azad bana de saaqi
vo uThin kaali ghaTa.en tauba
ab to piine ki raza de saaqi
jis se so.e hue dil chaunk uThen
naghma ik aisa suna de saaqi
tujh ko mustaqbil-e-zarrin ki qasam
pichhli baton ko bhula de saaqi
sadr-e-mai-ḳhana banaya tha kabhi
ab jahan chahe biTha de saaqi
vo jo tasbih liye hai us ko
mere aage se uTha de saaqi
nashsha-e-fikr abhi baaqi hai
ek jaam aur uTha de saaqi
qasr-e-auham ko Dhane ke liye
saara mai-ḳhana lunDha de saaqi
sab jise kahte hain ‘vamiq’ ‘vamiq’
ham ko bhi us se mila de saaqi
Leave a Reply