Pandit Vidya Rattan Asi
bhala chahega koi kya kisi ka
ho dushman aadmi jab aadmi ka
jafa-kari hai zinda aap hi se
jafa-kari hai sheva ap hi ka
mira sheva hai iḳhlas-o-mohabbat
bura chahunga main kyon kar kisi ka
ḳhuda ka shukr hai us bevafa ne
sabab puchha hai meri ḳhamushi ka
tire dil men bhi ho dard-e-mohabbat
tira dil kaash ho jaa.e kisi ka
dilon men hasrat-e-taḳhrib pinhan
labon pe zikr sulh-o-ashti ka
yahi me.araj hai ḳhud-agahi ki
na toḌo dil zamane men kisi ka
vahi dushman hue hain aaj ‘asi’
jo dam bharte the kal tak dosti ka
Leave a Reply