us ḳhush-ada ke aina-ḳhane men ja.unga
phir lauT kar main apne zamane men ja.unga
rah jaegi ye saari kahani yahin dhari
ik roz jab main apne fasane men ja.unga
ye sub.h o shaam yunhi rahenge mire charag
bas main tujhe jalane bujhane men ja.unga
ye khel hai to ḳhuub magar tere haath se
is TuTne bigaḌne banane men ja.unga
yunhi main ḳhud ko ḳhvab dikhane men aa gaya
yunhi main ḳhud ko ḳhvab dikhane men ja.unga
Leave a Reply