Shaad Aarfi
mayassar jin ki nazron ko tire gesu ke saa.e hain
ghazal ke ḳhushnuma uslub un ke haath aa.e hain
yagane aur begane ta.assub ne bana.e hain
vagarna sumbul o gul ek hi gulshan ke jaa.e hain
haqiqat nagavar-e-ḳhatir-e-nazuk na ban paa.i
kuchh is taknik se ham ne unhen qisse suna.e hain
to vo andaz jaise mera ghar paḌta ho raste men
pa.e-iz.har-e-hamdardi vo jab tashrif laa.e hain
naqab-e-ruḳh ulaT kar us ne chashm-e-shauq ke parde
samajh men kuchh nahin aata uTha.e hain gira.e hain
damakta hai jabin-e-naz par rang-e-pashemani
ab un se kya kaha jaa.e ki ye sadme uTha.e hain
lagavaT ki nigahon ne charagh-e-arzu-e-mandi
jala.e hain bujha.e bujha.e hain jala.e hain
jinhen mina-e-mai hasil hai jin ko durd-e-paimana
vo jaise aap ke apne hain ye jaise para.e hain
taghaful ki koi had bhi to honi chahiye aḳhir
bil-aḳhir bin bula.e ham tiri mahfil men aa.e hain
nazar aate hain taare is tarah savan ki raton men
kisi ne phuul kaghaz ke samundar men baha.e hain
yaqin hai ‘shad’ mujh ko kulliyat-e-nazm-e-fitrat se
gulon ne rang-o-nik.hat ke bahut mazmun chura.e hain
Leave a Reply