aankh men ḳhvab zamane se alag rakkha hai
aks ko a.ina-ḳhane se alag rakkha hai
ghar men gul-dan saja.e hain tiri aamad par
aur ik phuul bahane se alag rakkha hai
kuchh hava men bhi chalane ke liye rakkha jaa.e
is liye tiir nishane se alag rakkha hai
us ke honTon ko nahin aankh ko di hai tarjih
pyaas ko pyaas bujhane se alag rakkha hai
ghair-mumkin hai kisi aur ke haath aa jaa.e
vo ḳhazana jo ḳhazane se alag rakkha hai
ik hava si kahin bandhi hai chhupane ke liye
ik tamasha sa lagane se alag rakkha hai
ḳhvab hi ḳhvab men ta.amir kiya hai ‘azar’
ghar ko buniyad uThane se alag rakkha hai
Leave a Reply