arsh o kursi ki khabar laae hain laane vaale
ek muusa hi na the tuur ke jaane vaale
tuur ko tum ne jalaya to badi baat na ki
aag paani men lagate hain lagane vaale
mere marqad ko bhi aa kar kabhi thukra jaana
are o fitna-e-mahshar ke jagane vaale
ek aalam tire ashiq ne kiya khal-e-siyah
do hi naale kiye the tuur jalane vaale
kab talak apne karishme hamen dikhlaoge
ai miyan roz nae tarz dikhane vaale
meri taqdir jo palte to taajjub kya hai
sunte hain bigdi banate hain banane vaale
tum jo ankhon men miri aae to ehsan kiya
ankhen kya dil men samate hain samane vaale
laakh ho mana-e-fariyad magar kya hoga
arsh ko sar pe utha lenge uthane vaale
apni qismat nahin aisi ki ho didar ‘anjum’
muntazir jin ke hain kab aaen vo aane vaale
Leave a Reply