ḳhvab men manzar rah jaata hai
takiye par sar rah jaata hai
aa paḌti hai jhiil ankhon men
haath men patthar rah jaata hai
roz kisi hairat ka dhabba
a.ine par rah jaata hai
dil men basne vaala ik din
jeb ke andar rah jaata hai
nadiya par milne ka va.ada
mez ke uupar rah jaata hai
saal guzar jaata hai saara
aur calender rah jaata hai
angan ki ḳhvahish men koi
baam ke uupar rah jaata hai
lag jaati hai naav us paar
aur samundar rah jaata hai
ruḳhsat hote hote koi
darvaze par rah jaata hai
Leave a Reply