Sufi
mumkin hai shai vahi ho magar hu-ba-hu na ho
reg-e-ravan bhi dekh kahin aabju na ho
qaaem isi tazad ke dam se hai kaenat
main aarzu huun jis ki miri aarzu na ho
manzar badal badal ke bhi dekha hai barha
jo zakhm ab hai aankh pe shayad rafu na ho
sahta raha huun ek tasalsul se is liye
ye tut-phut hi miri vaj.h-e-numu na ho
main khud hi bujhne lagta huun jalte hue charagh
jis roz teri lau se miri guftugu na ho
dekho badal ke zaviya apni nigah ka
jo ru-ba-ru nahin hai vahi ru-ba-ru na ho
mere vajud se hai ye duniya-e-rang-o-bu
lekin mira jahan faqat rang-o-bu na ho
mushkil miri hadon ka taayyun hai ‘aftab’
vo raushni bhi kya hai ki jo chaar su na ho
Leave a Reply