Mere Ehsas Ki Rag Rag Mein Samane Wale

Saleem Shahid

mere ehsas ki rag rag men samane vaale

ab kahan hain mujhe din-rat satane vaale

dekh lete hain magar aankh chura jaate hain

dost har vaqt mujhe paas biThane vaale

band paani ki tarah bekas-o-majbur hain ab

tund maujon ki tarah shor machane vaale

ek patthar bhi sar-e-rahguzar rakkha hai

raat gahri hai zara dhyan se jaane vaale

kaun bujhte hue suraj ki taraf dekhega

hain ujalon ke talabgar zamane vaale

haar ke baiTh ga.e dhuup ki aghosh men ḳhud

sard raton men mira jism jalane vaale

gir ga.e ret ki divar ho jaise ‘shahid’

ban ke kohsar miri raah men aane vaale