sama.aton pe garan be-zabaniyan us ki
asir-e-dair-o-haram la-makaniyan us ki
har ek chehre pe be-chehragi ke saa.e hain
giraft men nahin atin nishaniyan us ki
ye kis ne lahn se kaaTa hai nuur ka rishta
ki be-nava huiin jadu-bayaniyan us ki
usi ka kasa-e-sar bhi usi ka patthar bhi
lahu usi ka lahu men ravaniyan us ki
vo sail-e-kar-e-jahan tha ki us ko bhuul gaya
phir aa ke mujh ko sunao kahaniyan us ki
‘shakeb’ karta raha vo to ne.amaten nazil
hamin se ho na sakin qadr-daniyan us ki
Leave a Reply