Samaaton Pe Garan Be-Zabaniyan Uski

samā.atoñ pe garāñ be-zabāniyāñ us kī

asīr-e-dair-o-haram lā-makāniyāñ us kī

har ek chehre pe be-chehragī ke saa.e haiñ

giraft meñ nahīñ ātīñ nishāniyāñ us kī

ye kis ne lahn se kaaTā hai nuur kā rishta

ki be-navā huiiñ jādū-bayāniyāñ us kī

usī kā kāsa-e-sar bhī usī kā patthar bhī

lahū usī kā lahū meñ ravāniyāñ us kī

vo sail-e-kār-e-jahāñ thā ki us ko bhuul gayā

phir aa ke mujh ko sunāo kahāniyāñ us kī

‘shakeb’ kartā rahā vo to ne.amateñ nāzil

hamīñ se ho na sakīñ qadr-dāniyāñ us kī

Leave a Comment