Humse Aashufta-Mizajon Ka Pata Puchhti Hai

ham se āshufta-mizājoñ kā pata pūchhtī hai

kitne baaqī haiñ diye roz havā pūchhtī hai

roz kaliyoñ ko khilāte hue kartī hai savāl

kis ke dāman kī mahak hai ye sabā pūchhtī hai

kis jagah tujh ko Thaharnā hai tamannā-e-jahāñ

laḌkhaḌāte hue ye laġhzish-e-pā pūchhtī hai

tishnagī aur hai sahrā-e-tamannā kitnī

jo barastī nahīñ khul ke vo ghaTā pūchhtī hai

raqs karte hue zarroñ se sadā aatī hai

gard hote hue anjām mirā pūchhtī hai

gardish-e-vaqt mehrbān hai itnī mujh par

koī pūchhe nahīñ ye had se sivā pūchhtī hai

Leave a Comment