ham se ashufta-mizajon ka pata puchhti hai
kitne baaqi hain diye roz hava puchhti hai
roz kaliyon ko khilate hue karti hai saval
kis ke daman ki mahak hai ye saba puchhti hai
kis jagah tujh ko Thaharna hai tamanna-e-jahan
laḌkhaḌate hue ye laghzish-e-pa puchhti hai
tishnagi aur hai sahra-e-tamanna kitni
jo barasti nahin khul ke vo ghaTa puchhti hai
raqs karte hue zarron se sada aati hai
gard hote hue anjam mira puchhti hai
gardish-e-vaqt mehrban hai itni mujh par
koi puchhe nahin ye had se siva puchhti hai
Leave a Reply