ḳhauf varna to kis ke bas ka hai
shahr ko hadson ka chaska hai
varna ham jism tak bhi aa jaate
mas.ala ruuh ki havas ka hai
aadmi to ḳhuda ke bas ka nahin
par ḳhuda aadmi ke bas ka hai
ik zarurat hai us ke pahlu men
aur badan sab ki dastaras ka hai
mundamil zaḳhm rista rahta hai
sha.iba daagh par bhi pas ka hai
ishq sahra nahin bagula hai
aur safar ret ke qafas ka hai
Leave a Reply