Karrar Noori
kyuun andheron men rahen raat basar hone tak
ḳhud hi ḳhurshid na ban jaa.en sahar hone tak
kitna achchha ho ki is baar mariz-e-shab-e-gham
achchha ho jaa.e masiha ko ḳhabar hone tak
kitni hi baar ḳhayalon men tire paas ga.e
ham-safar karte rahe vaqt-e-safar hone tak
hai ye tash.hir-e-mohabbat to kahin ba.ad ki chiiz
aap mil sakte hain duniya ko ḳhabar hone tak
dagh-e-dil apni hi sozish se bana hai ḳhurshid
aur kya guzregi qatre pe guhar hone tak
ai dil-e-va.ada-talab phir koi tajviz-e-vafa
ik nazar aur bhi ta.id-e-nazar hone tak
tere saath apne bhi jiine ki dua.en mangin
ham-safar saath rahe ḳhatm-e-safar hone tak
had bhi hoti hai koi tishna-labi ki ‘nuri’
ḳhud hi pi lete hain saaqi ki nazar hone tak
Leave a Reply