vo jo ab tak lams hai us lams ka paikar bane
meri ḳhvahish bhi ajab hai aa.ina patthar bane
ik hisar-e-rang men bas sochta rahta huun main
kis tarah andhi hava ki zad pe koi ghar bane
raste paanv banen to kaise tai hon raste
niind kaise aa.egi jab jism hi bistar bane
ḳhun-baha kis se talab ho kis ko qatil maniye
aap apni soch hi jab zahr ka ḳhanjar bane
qatl ho jab tak na suraj ka khilegi kaise shaam
rang hi bikhre na to kaise koi manzar bane
ek muddat samna ḳhud jin ko andhe-pan ka tha
raushni milte hi ḳhud ankhon ke sauda-gar bane
ḳhun-e-dil men Duub ja.ega to lab par aa.ega
jis ko main likhun vahi ‘manzur’ harf-e-tar bane
Leave a Reply