Khursheed Akbar
vo kaun hain phulon ki hifazat nahin karte
sunte hain jo ḳhushbu se mohabbat nahin karte
tum ho ki abhi shahr men masruf bahut ho
ham hain ki abhi zikr-e-shahadat nahin karte
qur.an ka mafhum unhen kaun bata.e
ankhon se jo chehron ki tilavat nahin karte
sahil se suna karte hain lahron ki kahani
ye Thahre hue log baghavat nahin karte
ham bhi tire beTe hain zara dekh hamen bhi
ai ḳhak-e-vatan tujh se shikayat nahin karte
is mausam-e-jam.hur men vo gul bhi khile hain
jo sahib-e-alam ki himayat nahin karte
ham banda-e-nachiz gunahgar hain lekin
vo bhi to zara barish-e-rahmat nahin karte
chehre hain ki sau rang men hote hain numayan
a.ine magar koi siyasat nahin karte
shabnam ko bharosa hai bahut barg-e-aman par
‘ḳhurshid’ bhi danista qayamat nahin karte
Leave a Reply