tu muamma hai to hal is ko bhi karna hai mujhe
tu samundar hai to phir tah men utarna hai mujhe
tu ne socha tha ki jalvon se bahal ja.unga
aise kitne hi sarabon se guzarna hai mujhe
karb jitna hai tiri aankh men barsa de magar
isi girdab men phans kar to ubharna hai mujhe
phir bapa hai vahi jazbat ka tufan to kya
isi bigḌe hue mausam men sanvarna hai mujhe
in dinon chand ki tasḳhir ki hai fikr ki kal
chandni ban ke zamane men utarna hai mujhe
kis tarah chhoḌ duun is shahr ko ai mauj-e-nasim
yahin jiina hai mujhe aur yahin marna hai mujhe
ruk gaya vaqt palaT aa.i hain biiti sadiyan
yahi vo lamha hai jab ‘sham’ bikharna hai mujhe
Leave a Reply