Amjad Islam Amjad
sadiyan jin men zinda hon vo sach bhi marne lagte hain
dhuup ankhon tak aa jaa.e to ḳhvab bikharne lagte hain
insanon ke ruup men jis dam saa.e bhaTken saḌkon par
ḳhvabon se dil chehron se a.ine Darne lagte hain
kya ho jaata hai in hanste jiite jagte logon ko
baiThe baiThe kyuun ye ḳhud se baten karne lagte hain
ishq ki apni hi rasmen hain dost ki ḳhatir hathon men
jitne vaale patte bhi hon phir bhi harne lagte hain
dekhe hue vo saare manzar na.e na.e dikhla.i den
Dhalti umr ki siḌhi se jab log utarne lagte hain
bedari asan nahin hai ankhen khulte hi ‘amjad’
qadam qadam ham sapnon ke jurmane bharne lagte hain
Leave a Reply