apne ehsas se bahar nahin hone deta
raaz zahir bhi ye mujh par nahin hone deta
ḳhauf-e-rusva.i se kar deta hai hairan aisa
meri ankhon ko samundar nahin hone deta
mom kar deta hai jab lauT ke aa jaata hai
mujh ko furqat men vo patthar nahin hone deta
dekhta huun to kabhi chand kabhi phuul hai vo
apni surat mujhe azbar nahin hone deta
ji men hai uḌ ke chala ja.un jahan rahta hai
vo mira ghar bhi mira ghar nahin hone deta
jab bhi milta hai to bas TuuT ke milta hai mujhe
apne gham ka mujhe ḳhugar nahin hone deta
ruuTh bhi jaate hain ‘ja.afar’ to mana lene men
mujh ko apne se vo behtar nahin hone deta
Leave a Reply