masafat-e-shab-e-hijran tavil likhte rahe
mile jo dard unhen sang-e-mil likhte rahe
hikayaten hi nahin likkhin aag ki ham ne
haqiqaten bhi ba-rang-e-khalil likhte rahe
jo qalb-o-jan men hai khushbu kisi ki zulfon ki
usi ko apni mata-e-jalil likhte rahe
rahi ye aas ki sairab hogi kisht-e-hayat
so jauhadon ko bhi dariya-e-nil likhte rahe
nikal saki na vahan ek buund bhi ‘fakhir’
tamam-umr jin ankhon ko jhiil likhte rahe
Leave a Reply