dekh jazbat-e-nazar sab ra.egan ho ja.enge
vo nihan hi kab hain nadan jo ayaan ho ja.enge
kya ḳhabar thi raz-ha-e-dil zaban ho ja.enge
mere do aansu bhi meri dastan ho ja.enge
jaan kho kar gham men jan-e-dastan ho ja.enge
ye nishani chhoḌ kar ham be-nishan ho ja.enge
asman-e-hashr hashr-e-asman ho ja.enge
jab ba-tashrih-e-javani vo javan ho ja.enge
be-ḳhudi ke bandagi ke zauq ke jazbat ke
ek hi sajde men saare imtihan ho ja.enge
ai ghalat-andesh mere ansuon ko tu na chheḌ
ye zamin par gir ga.e to asman ho ja.enge
tu Thahar kar kaash dekhe vo bhi vaqt aane ko hai
tujh se koson duur ai umr-e-ravan ho ja.enge
kamran sabit vahi honge rah-e-maqsud men
jo qadam barbad sa.i-e-ra.egan ho ja.enge
aaj sunte hain zamane ki ‘shifa’ ham dastan
kal zamane ke liye ḳhud dastan ho ja.enge
Leave a Reply