Aziz Hamid Madni
vo ek rau jo lab-e-nukta-chin men hoti hai
suḳhan vahi dil-e-andoh-gin men hoti hai
koi vo shak ka andhera ki jis ki jast ke ba.ad
chamak si silsila-ha-e-yaqin men hoti hai
bahar chak-e-gareban men Thahr jaati hai
junun ki mauj koi astin men hoti hai
vo ḳhaak anjum o mahtab ko nasib nahin
jo mauj marg o numu ki zamin men hoti hai
ghunuda din-e-buzurgan men ab vo lau na rahi
jo ahd-e-nau ke gham-e-atishin men hoti hai
ye raat ta.ir-e-hijrat-zada ghanimat hai
tulu-e-sub.h savad-e-kamin men hoti hai
kabhi kabhi to harifana koi atish-e-sang
farogh pa ke libas-e-nagin men hoti hai
Leave a Reply