Ehsan Danish
jab ruḳh-e-husn se naqab uTha
ban ke har zarra aftab uTha
Duubi jaati hai zabt ki kashti
dil men tufan-e-iztirab uTha
marne vaale fana bhi parda hai
uTh sake gar to ye hijab uTha
shahid-e-mai ki ḳhalvaton men pahunch
parda-e-nashsha-e-sharab uTha
ham to ankhon ka nuur kho baiThe
un ke chehre se kya naqab uTha
alam-e-husn-e-sadgi tauba
ishq kha kha ke pech-o-tab uTha
hosh naqs-e-ḳhudi hai ai ‘ehsan’
la uTha shisha-e-sharab uTha
Leave a Reply