ishq men ye hui halat tire divane ki
ab na jiine ki tamanna hai na mar jaane ki
raqs miina ka kabhi shoḳhiyan paimane ki
yaad aati hain faza.en tire maiḳhane ki
kuchh is andaz se tartib diya hai main ne
tum se tashrih na hogi mire afsane ki
meri qismat hi men likkhi thi tabahi ai dost
hai shikayat mujhe apne ki na begane ki
vo bhi bimar-e-mohabbat ka uḌate hain mazaq
dekh kar jin ko tavaqqo.a thi sambhal jaane ki
kyuun na tauqir karen aaj miri ahl-e-haram
ḳhaak chhani hai bahut main ne sanam-ḳhane ki
hijr alam ḳhalish soz taḌap dard-e-jigar
surḳhiyan hain ye mire ishq ke afsane ki
Leave a Reply