chamke hain sab ke bakht tiri jalva-gah men
vaan kuchh nahin tamiz safed-o-siyah men
rahmat jhalak rahi hai ghazab ki nigah men
dil pa raha hai lazzat-e-taat gunah men
hain jab tujhi pe shaikh-o-barahman mite hue
phir farq kya hai but-kada-o-khanqah men
pahle vahi bahisht men jaae to lutf hai
sabqat hui hai jis ki taraf se gunah men
bande huun taaki khilat-e-rahmat ke mustahiq
bhar di hai kuut kuut ke lazzat gunah men
tasir-e-ah-o-nala to maalum haan magar
dil ka bukhar khuub nikalta hai aah men
‘mushtaq’ aae raah pe vo shokh ya na aae
apni taraf se farq na aae nibah men
Leave a Reply