Saulat Zaidi
ye be-mausam jo purva.i bahut hai
surur-e-dard-e-tanha.i bahut hai
sharik-e-gham na ho koi to achchha
akeli ho to tanha.i bahut hai
abas shikva ki bunden DhunDhte ho
mire honTon ki gahra.i bahut hai
to kya main dushmanon men aa gaya huun
yahan to shor-e-paspa.i bahut hai
vo chalta hai hamesha bhiiḌ le kar
use ehsas-e-tanha.i bahut hai
tumhari yaad kitni ba-vafa hai
ki jab aa.i hai to aa.i bahut hai
kaha tha tum ne tanha.i men milna
ab aa jaao ki tanha.i bahut hai
tum ab ‘saulat’ kaho kuchh shoḳh ghazlen
jo dil ne li vo angḌa.i bahut hai
Leave a Reply