ain-mumkin hai kisi tarz-e-ada men aa.e
qissa-e-dard-e-vafa saut-o-sada men aa.e
rut badalte hi na.e rang ke manzar ubhre
kuchh parinde bhi na.i mauj-e-hava men aa.e
ham to a.ina-numa the hi safa-keshi men
naam kuchh aur bhi arbab-e-safa men aa.e
ishq ta-hal to matruk nahin ho paaya
inqilabat bhi go rah-e-vafa men aa.e
kuchh gul-e-nilofari jhiil ki tariki se
apni danist men aqlim-e-baqa men aa.e
kya kahen us ko tazadat-e-zamana ke siva
kitne darvesh the jo shahi qaba men aa.e
ḳhvab ankhon men liye ham bhi ba-ta.id-e-junun
kaise ik jalva-gah-e-ḳhvab-numa men aa.e
shorish-e-ahd men ye tazkira-e-ishq-e-vafa
jaise naghma sa koi bang-e-dara men aa.e
ḳhud ko gum kar ke kisi aur ke pa lene tak
marhale aur bhi takmil-e-ana men aa.e
Leave a Reply