abdul-ahad-saaz

Shakhsiyyat Ki Mausiqi

vo qubul-surat si

sanvli bhali aurat

thoda ruk ke dekhen to

kitni khubsurat hai

us ke narm lahje men

us ki soch ki khushbu

us ke zauq-e-poshish men

halke halke rangon ke

intikhab ka jaadu

fikr ki javan kirnen

us ki rup-rekhaen

ankhdiyon men kuchh khake

muztarib khayalon ke

ungliyon men rachnaen

naghma-e-takallum men

zer-o-bam kai ghaltan

zarf aur zarafat ke

zer-e-lab tabassum se

khul ke muskurane tak

pech-o-kham kai larzan

ikhtiyar-o-adat ke

sadgi men chehre ki

shama ik farozan si

aanch dard-mandi ki

lau kisi bulandi ki

junbish-e-ravish us ki

narm-gam o ahista

ik jahan-e-raanai

har nigah-e-shaista

kaif men latafat ke

tez hissiyat shamil

tegh se zehanat ki

us ki har ada qatil

vo qubul-surat si

sanvli bhali aurat

thoda ruk ke dekhen to

kitni khubsurat hai!

More Poems

Leave a Comment