Faheem Shanas Kazmi
barg-e-sada ko lab se uḌe der ho ga.i
ham ko bhi ab to ḳhaak hue der ho ga.i
ab sahilon pe kis ko sada de rahe ho tum
lamhon ke badban khule der ho ga.i
ai husn-e-ḳhud-parast zara soch to sahi
mehr-o-vafa se tujh ko mile der ho ga.i
tera visal ḳhair ab ik vaqi.a hua
ab apne-ap se bhi mile der ho ga.i
sadiyon ki ret Dhanp kar asuda ho ga.e
sar ko hamare tan se kaTe der ho ga.i
sarsar ho ya saba ho ki hon tez andhiyan
ham ko fasil-e-shab pe jale der ho ga.i
teri gali ke moḌ pe pahunche the jald ham
par tere ghar ko aate hue der ho ga.i
ik daur tha ‘shanas’ sada thi miri buland
aur ab to mere honT sile der ho ga.i
Leave a Reply