nahin minnat-kash-e-tab-e-shunidan dastan meri
khamoshi guftugu hai be-zabani hai zaban meri
ye dastur-e-zaban-bandi hai kaisa teri mahfil men
yahan to baat karne ko tarasti hai zaban meri
uthae kuchh varaq laale ne kuchh nargis ne kuchh gul ne
chaman men har taraf bikhri hui hai dastan meri
uda li qumriyon ne tutiyon ne andalibon ne
chaman valon ne mil kar luut li tarz-e-fughan meri
tapak ai shama aansu ban ke parvane ki ankhon se
sarapa dard huun hasrat bhari hai dastan meri
ilahi phir maza kya hai yahan duniya men rahne ka
hayat-e-javedan meri na marg-e-na-gahan meri
mira rona nahin rona hai ye saare gulistan ka
vo gul huun main khizan har gul ki hai goya khizan meri
darin hasrat sara umrist afsun-e-jaras daram
z faiz-e-dil tapidan-ha kharosh-e-be-nafas daram
riyaz-e-dahr men na-ashna-e-bazm-e-ishrat huun
khushi roti hai jis ko main vo mahrum-e-masarrat huun
miri bigdi hui taqdir ko roti hai goyai
main harf-e-zer-e-lab sharminda-e-gosh-e-samaat huun
pareshan huun main musht-e-khak lekin kuchh nahin khulta
sikandar huun ki aina huun ya gard-e-kudurat huun
ye sab kuchh hai magar hasti miri maqsad hai qudrat ka
sarapa nuur ho jis ki haqiqat main vo zulmat huun
khazina huun chhupaya mujh ko musht-e-khak-e-sahra ne
kisi ko kya khabar hai main kahan huun kis ki daulat huun
nazar meri nahin mamnun-e-sair-e-arsa-e-hasti
main vo chhoti si duniya huun ki aap apni vilayat huun
na sahba huun na saaqi huun na masti huun na paimana
main is mai-khana-e-hasti men har shai ki haqiqat huun
mujhe raz-e-do-alam dil ka aina dikhata hai
vahi kahta huun jo kuchh samne ankhon ke aata hai
ata aisa bayan mujh ko hua rangin-bayanon men
ki bam-e-arsh ke taair hain mere ham-zabanon men
asar ye bhi hai ik mere junun-e-fitna-saman ka
mira aina-e-dil hai qaza ke raz-danon men
rulata hai tira nazzara ai hindostan mujh ko
ki ibrat-khez hai tera fasana sab fasanon men
diya rona mujhe aisa ki sab kuchh de diya goya
likha kalk-e-azal ne mujh ko tere nauha-khvanon men
nishan-e-barg-e-gul tak bhi na chhod us baagh men gulchin
tiri qismat se razm-araiyan hain baghbanon men
chhupa kar astin men bijliyan rakkhi hain gardun ne
anadil baagh ke ghafil na baithen ashiyanon men
sun ai ghafil sada meri ye aisi chiiz hai jis ko
vazifa jaan kar padhte hain taair bostanon men
vatan ki fikr kar nadan musibat aane vaali hai
tiri barbadiyon ke mashvare hain asmanon men
zara dekh us ko jo kuchh ho raha hai hone vaala hai
dhara kya hai bhala ahd-e-kuhan ki dastanon men
ye khamoshi kahan tak lazzat-e-fariyad paida kar
zamin par tu ho aur teri sada ho asmanon men
na samjhoge to mit jaoge ai hindostan vaalo
tumhari dastan tak bhi na hogi dastanon men
yahi ain-e-qudrat hai yahi uslub-e-fitrat hai
jo hai rah-e-amal men gam-zan mahbub-e-fitrat hai
huvaida aaj apne zakhm-e-pinhan kar ke chhodunga
lahu ro ro ke mahfil ko gulistan kar ke chhodunga
jalana hai mujhe har sham-e-dil ko soz-e-pinhan se
tiri tarik raton men charaghan kar ke chhodunga
magar ghunchon ki surat huun dil-e-dard-ashna paida
chaman men musht-e-khak apni pareshan kar ke chhodunga
pirona ek hi tasbih men in bikhre danon ko
jo mushkil hai to is mushkil ko asan kar ke chhodunga
mujhe ai ham-nashin rahne de shaghl-e-sina-kavi men
ki main dagh-e-mohabbat ko numayan kar ke chhodunga
dikha dunga jahan ko jo miri ankhon ne dekha hai
tujhe bhi surat-e-aina hairan kar ke chhodunga
jo hai pardon men pinhan chashm-e-bina dekh leti hai
zamane ki tabiat ka taqaza dekh leti hai
kiya rifat ki lazzat se na dil ko ashna tu ne
gizari umr pasti men misal-e-naqsh-e-pa tu ne
raha dil-basta-e-mahfil magar apni nigahon ko
kiya bairun-e-mahfil se na hairat-ashna tu ne
fida karta raha dil ko hasinon ki adaon par
magar dekhi na us aine men apni ada tu ne
taassub chhod nadan dahr ke aina-khane men
ye tasviren hain teri jin ko samjha hai bura tu ne
sarapa nala-e-bedad-e-soz-e-zindagi ho ja
sapand-asa girah men bandh rakkhi hai sada tu ne
safa-e-dil ko kya araish-e-rang-e-taalluq se
kaf-e-aina par bandhi hai o nadan hina tu ne
zamin kya asman bhi teri kaj-bini pe rota hai
ghazab hai satr-e-quran ko chalipa kar diya tu ne
zaban se gar kiya tauhid ka daava to kya hasil
banaya hai but-e-pindar ko apna khuda tu ne
kuen men tu ne yusuf ko jo dekha bhi to kya dekha
are ghafil jo mutlaq tha muqayyad kar diya tu ne
havas bala-e-mimbar hai tujhe rangin-bayani ki
nasihat bhi tiri surat hai ik afsana-khvani ki
dikha vo husn-e-alam-soz apni chashm-e-pur-nam ko
jo tadpata hai parvane ko rulvata hai shabnam ko
zara nazzara hi ai bul-havas maqsad nahin us ka
banaya hai kisi ne kuchh samajh kar chashm-e-adam ko
agar dekha bhi us ne saare aalam ko to kya dekha
nazar aai na kuchh apni haqiqat jaam se jam ko
shajar hai firqa-arai taassub hai samar us ka
ye vo phal hai ki jannat se nikalvata hai aadam ko
na uttha jazba-e-khurshid se ik barg-e-gul tak bhi
ye rifat ki tamanna hai ki le udti hai shabnam ko
phira karte nahin majruh-e-ulfat fikr-e-darman men
ye zakhmi aap kar lete hain paida apne marham ko
mohabbat ke sharar se dil sarapa nuur hota hai
zara se biij se paida riyaz-e-tur hota hai
dava har dukh ki hai majruh-e-tegh-e-arzu rahna
ilaj-e-zakhm hai azad-e-ehsan-e-rafu rahna
sharab-e-be-khudi se ta-falak parvaz hai meri
shikast-e-rang se sikha hai main ne ban ke bu rahna
thame kya dida-e-giryan vatan ki nauha-khvani men
ibadat chashm-e-shair ki hai har dam ba-vazu rahna
banaen kya samajh kar shakh-e-gul par ashiyan apna
chaman men aah kya rahna jo ho be-abru rahna
jo tu samjhe to azadi hai poshida mohabbat men
ghulami hai asir-e-imtiyaz-e-ma-o-tu rahna
ye istighna hai paani men nigun rakhta hai saghar ko
tujhe bhi chahiye misl-e-habab-e-abju rahna
na rah apnon se be-parva isi men khair hai teri
agar manzur hai duniya men o begana-khu rahna
sharab-e-ruh-parvar hai mohabbat nau-e-insan ki
sikhaya is ne mujh ko mast be-jam-o-subu rahna
mohabbat hi se paai hai shifa bimar qaumon ne
kiya hai apne bakht-e-khufta ko bedar qaumon ne
bayaban-e-mohabbat dasht-e-ghurbat bhi vatan bhi hai
ye virana qafas bhi ashiyana bhi chaman bhi hai
mohabbat hi vo manzil hai ki manzil bhi hai sahra bhi
jaras bhi karvan bhi rahbar bhi rahzan bhi hai
maraz kahte hain sab is ko ye hai lekin maraz aisa
chhupa jis men ilaj-e-gardish-e-charkh-e-kuhan bhi hai
jalana dil ka hai goya sarapa nuur ho jaana
ye parvana jo sozan ho to sham-e-anjuman bhi hai
vahi ik husn hai lekin nazar aata hai har shai men
ye shirin bhi hai goya be-sutun bhi kohkan bhi hai
ujada hai tamiz-e-millat-o-ain ne qaumon ko
mire ahl-e-vatan ke dil men kuchh fikr-e-vatan bhi hai
sukut-amoz tul-e-dastan-e-dard hai varna
zaban bhi hai hamare munh men aur tab-e-sukhan bhi hai
nami-gardid ko tah rishta-e-maani riha kardam
hikayat buud be-payan ba-khamoshi ada kardam
Leave a Reply