Yunus Ghazi
paas hote hue juda kyuun hai
is qadar ham se vo ḳhafa kyuun hai
tauba kar li jab us ne piine se
janib-e-mai-kada gaya kyuun hai
nik.hat-e-gul chaman men hai maujud
jaane avara phir saba kyuun hai
mujh pe jaur-o-sitam hi achchhe the
mehrban ab vo bevafa kyuun hai
hain sabhi par tumhare mehr-o-karam
mujh pe lekin sitam rava kyuun hai
zulf bikhri hai shaam se pahle
ye ada kya hai ye ada kyuun hai
talib-e-did kab se hai ‘ghazi’
vo hijabat men chhupa kyuun hai
Leave a Reply