jab hijr ke shahr men dhuup utri main jaag paḌa to ḳhvab hua
miri soch ḳhizan ki shaḳh bani tira chehra aur gulab hua
barfili rut ki tez hava kyuun jhiil men kankar phenk ga.i
ik aankh ki niind haram hui ik chand ka aks ḳharab hua
tire hijr men zehn pighalta tha tire qurb men ankhen jalti hain
tujhe khona ek qayamat tha tira milna aur azaab hua
bhare shahr men ek hi chehra tha jise aaj bhi galiyan DhunDti hain
kisi sub.h usi ki dhuup khili kisi raat vahi mahtab hua
baḌi umr ke ba.ad in ankhon men koi abr utra tiri yadon ka
mire dil ki zamin abad hui mire gham ka nagar shadab hua
kabhi vasl men ‘mohsin’ dil TuuTa kabhi hijr ki rut ne laaj rakhi
kisi jism men ankhen kho baiThe koi chehra khuli kitab hua
Leave a Reply