Nazeer Siddiqui
ye jo insan ḳhuda ka hai shahkar
is ki qismat pe hai ḳhuda ki maar
marg-e-dushman ki aarzu hi sahi
dil se nikle kisi tarah to ghubar
naam badnam ho chuka hazrat
kijiye ab to jurm ka iqrar
ittifaqi hai do dilon ka milap
kaun sunta hai varna kis ki pukar
jiina marna hai ban paḌe ki baat
na ye asan aur na vo dushvar
kis ko parva ki un pe kya guzri
zindagi se jo ho ga.e bezar
multafit ḳhud na ho agar koi
aah be-sud aur fughan bekar
pur-sukun niind chahte ho ‘nazir’
saath laana tha qismat-e-bedar
Leave a Reply