phir sho.ala-e-gul mauj-e-saba chahiye yaaro
gulnar gulistan ki faza chahiye yaaro
pairahan-e-jan chaak rahe tez hava men
tufan men jiine ki ada chahiye yaaro
matlub ho gar shahid-e-ma.ani ki tajalli
alfaz ki sad-rang qaba chahiye yaaro
shadab na.i rut se hai gulzar-e-adab bhi
phulon ko tar-o-taza hava chahiye yaaro
jitne bhi dariche hain sabhon ko na karo band
ik aadh daricha to khula chahiye yaaro
shishe ki koi chiiz salamat na rahegi
is daur men patthar ki ana chahiye yaaro
dil sang-e-malamat se hina-rang hai lekin
kuchh aur rifaqat ka sila chahiye yaaro
Leave a Reply