Yaad Kya Kya Log dasht-e-Be-Karan Mein Aae The

Ahmad Hamdani

yaad kya kya log dasht-e-be-karan men aae the

rang lekin kab ye chashm-e-khun-fishan men aae the

kis tamanna se tumhen dekha tha kis chahat se ham

raqs karte halqa-e-varaftagan men aae the

suraten kya kya dil-e-aina-gar men bas gaiin

ham se be-surat bhi to bazm-e-jahan men aae the

sadgi se ham ne samjha tha hamara zikr hai

tazkire kuchh aur hi un ke bayan men aae the

har nai mushkil pe ham socha kiye hain der tak

log pahle bhi to kuchh shahr-e-butan men aae the

ye gul-e-tar ki si khushbu kis taraf se aa gai

ham bagule the bhala kab gulistan men aae the

kyuun hamare saans bhi hote hain logon par giran

ham bhi to ik umr le kar is jahan men aae the