Ali Manzoor Hyderabadi
ik hasin ko dil de kar kya bata.en kya paaya
lazzat-e-fana chakkhi ziist ka maza paaya
manzilon ki saḳhti ka gham nahin ḳhushi ye hai
kis hujum-e-hasrat men ham ne rasta paaya
qadr us ki pahchanen aap ya na pahchanen
apne dil ko ham ne to hasb-e-mudda.a paaya
be-ḳhudi ki hasrat kya be-sabab main karta tha
aa ke hosh men samjha be-ḳhudi men kya paaya
shaiḳh ye tahi saghar haan isi ko saaqi ne
mere kaam ka paaya ya tere kaam ka paaya
hasraten sarasima har taraf nazar aa.iin
karvan-e-dil main ne phir luTa hua paaya
meri mastiyan samjhen teri shoḳhiyan janen
tu ne kya liya mujh se main ne tujh se kya paaya
sab ye rang-amezi hai faqat taḳhayyul ki
kya bata.un kya khoya kya jata.un kya paaya
paas baiTh kar mere dekhte nahin mujh ko
un ki sharm ko main ne sabr-azma paaya
sa.i-e-paiham ai ‘manzur’ is qadr nashat-afza
na-umid kis se the kis se ye sila paaya
Leave a Reply