Hasan Naim
basar ho yuun ki har ik dard hadisa na lage
guzar bhi jaa.e koi gham to vaqi.a na lage
kabhi na phuul se chehre pe gard-e-yas jame
ḳhuda kare ki use ishq ki hava na lage
nazar na aa.e mujhe husn ke siva kuchh bhi
vo bevafa bhi agar hai to bevafa na lage
yahi dua hai vo jab ho jamal se agah
libas-e-naz bhi pahne to dusra na lage
vo mehrban sa lage us ki kuchh karo tadbir
ḳhafa bhi ho to miri aankh ko ḳhafa na lage
mile jo nur-talab dil bhi yuun munavvar ho
mira harif bhi sham-o-sahar bura na lage
kahan se la.un ‘hasan’ guftugu men vo andaz
mira kalam kisi ko bhi be-maza na lage
Leave a Reply