bisat-e-danish-o-harf-o-hunar kahan kholen
ye sochte hain lab-e-mo’tabar kahan kholen
ajab hisar hain sab apne gird khinche hue
vajud ki vahi divar dar kahan kholin
paḌav Dalen kahan raste men shaam hui
bhanvar hain samne raḳht-e-safar kahan kholen
yahan shu.ur ke naḳhun to ham bhi rakhte hain
magar ye uqda-e-fikr-o-nazar kahan kholen
na is ke saath hamara bhi mol hone lage
hain kashmakash men ki musht-e-guhar kahan kholen
hava hai tez na is ke varaq uḌa le jaa.e
sahifa-e-nafas-e-muḳhtasar kahan kholen
bacha.en aabru jismon ki bhiiḌ men kaise
hai kholni girah-e-jan magar kahan kholen
koi ‘faza’ to mile ham ko qabil-e-parvaz
ab in hadon men bhala bal-o-par kahan kholen
Leave a Reply