Kaise Samjhaun Nasim-E-Subh Tujhko Kya Hun Main

Akhtar Saeed Khan

kaise samjha.un nasim-e-sub.h tujh ko kya huun main

phuul ke saa.e men murjhaya hua patta huun main

ḳhaak ka zarra bhi koi tere daman men na tha

qadr kar ai zindagi TuuTa hua taara huun main

har dhaḌakte dil se an-jana sa rishta hai mira

aag daman men kisi ke bhi lage jalta huun main

apni tariki sameTe puchhti hai mujh se raat

kaun si hai sub.h jis ko DhunDhne nikla huun main

mujh ko samjha.e to koi razdar-e-ka.enat

mujh men hai abad ye duniya ki ḳhud apna huun main

zindagi TuuTe hue ḳhvabon men guzri hai to kyaa!

aaj bhi ik ḳhvab ankhon men liye baiTha huun main

samt-e-manzil hi badal jaa.e to mera kya qusur

raston se puchh kar dekho kahin Thahra huun main

der tak hasrat se dekhegi use sham-e-safar

jis zamin par naqsh apne chhoḌ kar guzra huun main

chupke chupke raat bhar kahta hai ‘aḳhtar’ mujh se dil

bastiyan abad hain mujh se magar sahra huun main