Tariq Qamar
saare zaḳhmon ko zaban mil ga.i gham bolte hain
ham magar zarf se majbur hain kam bolte hain
kis qadar toḌ diya hai use ḳhamoshi ne
koi bole vo samajhta hai ki ham bolte hain
kya ajab log the guzre hain baḌi shaan ke saath
raste chup hain magar naqsh-e-qadam bolte hain
vaqt vo hai ki ḳhuda ḳhair, ba-nam-e-iman
dair valon ki zaban ahl-e-haram bolte hain
kahte hain zarf ka sauda nahin karte ham log
kis qadar jhuuT ye sab ahl-e-qalam bolte hain
kahin rahte hain dar-o-bam nadamat se ḳhamosh
bikhri inTon men kahin jah-o-hasham bolte hain
baat bhi karte hain ehsan jatane ki tarah
kaise lahje men ye ab ahl-e-karam bolte hain
kaun ye pursish-e-ahval ko aaya ‘tariq’
lab hain ḳhamosh magar dida-e-nam bolte hain
Leave a Reply