is tavaqqo pe ki dekhun kabhi aate jaate
ghis gae paanv rah-e-dost men jaate jaate
fikr-e-dozakh men hamen rafa-maasi ki padi
aag par daman-e-tar ko hain sukhate jaate
ghair ka zor chale un pe aur un ka mujh par
kahte hain munh se ho kyuun raal udate jaate
ghair ko le ke girani ki na thahri hoti
apne darvaze se mujh ko na uthate jaate
kyuun nishan chhod gae tez-ravan-e-rah-e-ishq
kaaba-o-but-kada ko chahiye dhate jaate
aag se sabza kabhi aur kabhi nakhl se aag
hain har ik rang men nairang dikhate jaate
sabza ban jaenge akhir ko chaman ke sab sarv
sharm se teri zamin men hain samate jaate
mujh se bigde hue un ko hui muddat ‘nazim’
biich vaale hain abhi baat banate jaate
Leave a Reply