Aslam Kolsarii
arzu-e-davam karta huun
zindagi vaqf-e-am karta huun
aap se iḳhtilaf hai lekin
aap ka ehtiram karta huun
mujh ko taqrib se ta.alluq kya
main faqat ehtimam karta huun
dars-o-tadris ishq mazduri
jo bhi mil jaa.e kaam karta huun
justuju hi mira asasa hai
ja ise tere naam karta huun
haan magar barg-e-zard ki surat
sub.h ko main bhi shaam karta huun
vaqt guzre pe aa.e ho ‘aslam’
ḳhair kuchh intizam karta huun
Leave a Reply