dil-e-muztar se nalan hain udhar vo bhi idhar ham bhi
mohabbat men pareshan hain udhar vo bhi idhar ham bhi
kise fursat hai maazi ki purani dastan chheḌe
gham-e-hazir men ghaltan hain udhar vo bhi idhar ham bhi
ba-zahir koi hairani nahin tark-e-mohabbat par
magar dil men pasheman hain udhar vo bhi idhar ham bhi
ḳhizan ke jaur-e-paiham ki shikayat hai to donon ko
talabgar-e-baharan hain udhar vo bhi idhar ham bhi
unhen jaane ki jaldi hai hamen zid hai ki ruk jaa.en
gharaz donon pareshan hain udhar vo bhi idhar ham bhi
Leave a Reply