jigar se jaan se pyare kahan hai kuchh to bata
har ek dil ke sahare kahan hai kuchh to bata
tiri talash men khoi hui hai chashm-e-falak
zamin ke raj-dulare kahan hai kuchh to bata
masarraton se tha labrez dil ka paimana
miri ḳhushi ke sahare kahan hai kuchh to bata
jo tu nahin hai to phaili hui hai tariki
mire chamakte sitare kahan hai kuchh to bata
dil-e-‘ra.is’ ko hai kaif-e-zindagi ki talash
hayat-e-nau ke ishare kahan hai kuchh to bata
Leave a Reply