hans hans ke bolne ki faza kaun le gaya
angan se shor-o-ghul ki sada kaun le gaya
piine lagi hain zahr-e-tafakkur shararten
bachchon se bhole-pan ki ada kaun le gaya
sach bolne ki saari rivayat kahan ga.i
virse men jo mili thi faza kaun le gaya
de ke shajar shajar ko udasi ki tez dhuup
shaḳhon se pattiyon ki rida kaun le gaya
asudgi ki khoj men nikla huun su-e-dasht
shahron ki pur-sukun faza kaun le gaya
barud rakh ke mere darichon ke as-pas
sarsabz vadiyon ki hava kaun le gaya
mehnat-kashon ko bhuuk hi ḳhairat men mili
ravaq ban ke rizq-e-vafa kaun le gaya
Leave a Reply