ye soch ke raakh ho gaya huun
main shaam se sub.h tak jala huun
jis dil men panah DhunDhta tha
ab us se panah mangta huun
pahle bhi ḳhuda ko manta tha
aur ab bhi ḳhuda ko manta huun
vo jaag raha ho shayad ab tak
ye soch ke main bhi jagta huun
ai mera ḳhayal rakhne vaale
kya main tire zehn men basa huun
marta huun ki mar-miTunga aḳhir
jiine ko to umr-bhar jiya huun
har shaḳhs bichhaḌ chuka hai mujh se
kya janiye kis ko DhunDhta huun
hai mujh se hi zindagi ibarat
main ziist ka talḳh tajraba huun
kya samjhega koi mujh ko ‘sabir’
main zaat se apni mavara huun
Leave a Reply