Kafeel Aazar Amrohvi
koi manzil nahin milti to Thahar jaate hain
ashk ankhon men musafir ki tarah aate hain
kyuun tire hijr ke manzar pe sitam Dhate hain
zaḳhm bhi dete hain aur ḳhvab bhi dikhlate hain
ham bhi in bachchon ki manind koi pal ji len
ek sikka jo hatheli pe saja laate hain
ye to har roz ka ma.amul hai hairan ho kyuun
pyaas hi piite hain ham bhuuk hi ham khate hain
har baḌa bachchon ko jiine ki dua deta hai
ham bhi shayad isi virse ki saza paate hain
sub.h le jaate hain ham apna janaza ghar se
shaam ko phir ise kandhon pe uTha laate hain
shahr ki bhiiḌ men kya ho isi ḳhatir ‘azar’
apni pahchan ko ham ghar men hi chhoḌ aate hain
Leave a Reply